Bei unserem Kamerad
Von unseren Sängern
Hier ein Gedicht Geschrieben von Heinz Heim
***********************************************************
Scho wieder ä Schlankmacherdiät
Wie mini Waag hätt zeiget hütt am Morge
Bin ich nöd der Einzig mit Übergewichtsorge
Doch han ich zum Abmagere kei anderi Wahl
Dänn die Waag wo ich druf stah, isch digital
Die Waag zeigt alles ob wotsch oder nööd
Verbruchti Kalorie, Fettateil, das tönt scho fascht blööd.
Scho eleige s’druff schtah isch e Zeremonie,
am beschte bisch barfuess bis wiit obe a d‘ Chnüü.
Die alt Waag mit em Zeiger han ich müesse entsorge,
well ich einisch mit 100 Kilo am früene Morge,
uf d‘ Waag gumpet bin, das git so en Chlapf,
de Hund schtaht vor Schreck in Fueternapf
De Zeiger vo de Waag, das isch dänn nöd gloge,
isch bis in Norde vo Schwede ufe gfolge
det obe sind druf abe viel Vögel go flüüge
und bi de Landig hät mer d‘ Flügel grad müesse büüge
De Fluug vom Zeiger duuret sächzig Sekunde
De Zeiger vo de Waag hät mer niene meh gfunde.
Au im Schwiizer Radio vom DRS Eis,
häts en Ischaltsändig gää, wie jede no weiss.
Und das alles wäge guet 30 Kilo Übergwicht,
doch jetzt no zu de verschprochene Gschicht:
Doch will ich zu eu hüt Abig ganz ehrlich sii,
ich bin gar nöd z‘ schwär, ich bin nur viel z‘ chlii.
Ich weiss das ich zschwär bin, aber was sölls
Ich bin no lang nöd so dick wie de Bulle vo Tölz
Bi minere Kur chasch pfundwiis Süesses vertrucke,
dörfsch alles guet chöie, aber nüt abeschlucke.
Au en Ananas Kur han ich scho gmacht
Han alles usser Ananas gässe, au das hät nüt bracht.
Am liebschte han ich Wurscht-Chässalat
Und au da han ich für eu es Rezäpt parat:
Also Wurscht und Chäs chasch völlig vergässe,
Zäme sind das 800 Kalorie, das dörf ich nöd ässe.
Bliibet es paar Redli Zwieble und s‘ Öl für d’Sosse
Und es paar Löffel Essig und zwar vo de ganz grosse.
Drü Ässlöffel Öl das git vierzig Gramm,
gwichtsmässig öppe d‘ Helfti vome trochene Schwamm.
Alles guet mische und bald chan ich ässe,
doch han ich vom Öl Kalorie vergässe,
900 Kalorie multipliziert mit null Komma null vier
Git glich viel wie 900 geteilt durch 25, jetzt bruch ich es Bier.
Vom feine Wurscht-Chässalat, das muess eim ja Chrible
Bliibt am Schluss nur suure Essig und einigi Zwieble.
Es isch doch klar und mer channs fasch vermuete,
bi däm Menue wünscht dir ganz ehrlich niemert en Guete.
Schnitzel ohni Paniermähl und ganz ohni Fett
So dünn gschnitte, dass es nur no ei Siite het
Fettfreies Gmües dörf ich ha ohni jegliches Mass
Ich bin doch kei Chue und friss nur no Grass
Am Schluss bin ich nur no füfzig Kilogramm
Xeen us wie en Stäcke und mini Finger sind klamm
Uusxsee wie Claudia Schiffer das chasch dänn vergässe
Ich höre jetzt uuf und gang hei go ässe.
Machets guet eue Heinz
